毛里裘斯自駕遊。Baystone Hotel Dinner(Day 1)

4月5日(星期六..Day 1)~下午租左車..先去北部欣賞風景

回程再返Super U上少少乾糧+酒..等夜晚可以係房飲

返酒店途中..同老闆計下行果段路~慢行40分鐘ma

坐車唔駛8分鐘已經返到酒店~所以有車真係勁方便

唔駛行到熱晒..個人真係好易攰~又可以慳好多時間

去到目的地..慢慢hea夠先走(當刻從心而發..真係感到好幸福)

返到房..未夠鐘食晚餐~整個Happy Hour休息下先

~ ~ ~ ~ ~ ~ ~ ~ ~ ~

今次同酒店訂左Half Board~包早餐+晚餐

其實夜晚唔出去搵食都係好事~其一街燈照明不足

加上我夜晚視力好弱~"人肉GPS"分分鐘會失靈(哈哈)

同埋..最主要當地人鐘意亂過馬路~佢地預你讓佢行

多過驚你揸車撞到佢~加上皮膚勁黑..著d衫又沉色

真係睇佢地唔到架~所以夜晚揸車要格外留神呢

~ ~ ~ ~ ~ ~ ~ ~ ~ ~

酒店晚餐..第一日揀坐outside~環境+氣氛都好好

酒店客人以情侶/夫婦為主(除左我地..全部法國人~所以比較幽靜)

而大堂位置會有個黑板寫下"是日晚餐"(不過好後期先發現)

晚餐唔會有餐牌~每晚由服務員親自同每檯客落order

同時..仲會講解用咩材料+煮理方法呢


餐飲方面..以法國菜為主

order後..服務員會提麵包籃比客人挑選



每晚4道菜..第一道"合桃多士伴芝士角"



多士好精緻..脆口帶點點牛油香~合桃做餡有咬感+好味

芝士角好香脆~淡淡芝士..伴上香草及番茄茸醬料~好開胃



"香草檸檬汁伴魚"



魚類全部無記載(:p)~但肉質幾似食剌身魚

灑上檸檬汁~再伴香草及檸檬茸同食..又係好開胃





"Green Salad"



除左沙律菜..仲有炸芋頭片~好脆帶淡淡香芋味



醬汁主要有醬油+甜甜地果醬味



"香柚絲烤魚伴什菌薯粒"



依道d魚一般都過熟..口感比較鞋~而伴碟醬汁惹味開胃





伴菜有薯粒,冬菇絲,番茄,黑橄欖~簡單用香草+鹽作調味



"香草咖喱燴雞(伴飯)"



配料好多時都用鹹檸檬~不同配搭..味道都好唔錯

依個汁有淡淡咖喱+黃薑味~鹹檸檬味比例較多

所以又係一個好開胃既主菜



跟上既飯..通常都係用印度米

依個飯既味道好特別~有d似果皮味但又無咁甘苦



甜品.."拖肥曲奇雪糕"



當地人好活用"椰子"~每一個部份都係寶..會用到盡

餐飲中..最常用未熟既椰子肉~因為未熟既椰肉好軟滑

相反熟左既椰肉..係硬到食唔到~首先取出椰肉後磨茸

再用於製造甜品類~而用於伴碟既茸類都好常見



畫花好似一隻天鵝..好靚呢

依款雪糕唔似香港食既口感~滑之中會比較鬆散

我其實習慣少甜..甚至無糖~所以覺得個甜品真係好甜



"朱古力Mousse Cake"..賣相好靚



mousse cake非常軟滑..朱古力夠濃郁~但同樣超甜



唔係綠茶雪糕~加左食用色素調出顏色

味道帶清甜~無mousse cake咁甜漏感



當地果醬都幾出名..我反而最like食伴碟果jam

果香味好突出~起碼甜度正常易接受到



飲品唔包~Drink List有..juice, cocktails, red/white/rose wine, beers

幾晚都散點飲品~會keep單到check out果日計數

食完飯..返房梳洗+休息lu~聽日行程繼續^^



(待續)