食譜。瑤柱蘿蔔糕

2月12日(星期一)~好在..上星期六叫老闆幫我買定整糕材料

諗住今日先整既~點知Agent突然通知..工人姐姐提早走得

過程都幾煩複~哎! 原本話預計2月9日黎..但又話未肯定

要等舊僱主個新工人黎左先放人~之後又一直無左消息

我以為佢個僱主等約完先比佢走~如果過埋年..我仲輕鬆添

點知星期六..通知話星期一黎~攪到我過年前既安排都要重組

因為又要帶佢幾日~過年前日日都唔得閒~唯有早少少

星期日..我全日係屋企整"糕糕GO"~老闆就入奶奶屋企打點囉

********
奶奶出院後..叫佢唔好再花時間整"xo醬"(有時間做多d物理治療好過啦)

所以今年既糕點..全部轉晒用瑤柱~2018。瑤柱蘿蔔糕

食材有 : 瑤柱, 金華火腿, 臘腸, 蝦米

第一次開始整"蘿蔔糕"~一直keep住用返同一做法

因為失敗率肯定係"零"~除左手切蘿蔔..最重要先煮白蘿蔔

等白蘿蔔充份出水~落粉漿既時間..自然會好容易控制

用瑤柱水+清水(共400ml)..煮完白蘿蔔後

倒出黎既蘿蔔水..會over 1000ml~留用mix粘米粉

爆透食材+將半熟白蘿蔔條炒到完全收水(鑊底明顯係乾身的)

轉慢火..慢慢邊倒入粉漿邊炒勻~直至黏稠

入模..再放上預留既"瑤柱絲"作點綴

買7斤多少少白蘿蔔..整左6盒份量

今年老闆話..整少少比佢d同事們試食下喎

好幾年轉用"李祥和"粘米粉..就咁睇上去都好滑感

早餐煎幾件比老闆食~成日入廚房話..要燶d燶d(哈哈)

我覺得點ABC辣醬最好味~老闆反而like點中式辣醬

食譜 : 

材料 : 1.白蘿蔔(7斤-4200g)   2.粘米粉(1包-600g)   3.清水(400ml)
食材 : 1.蝦米(1/2細碗)   2.臘腸(1.5條)   3.瑤柱(5粒-浸透起絲)   4.金華火腿(3片-切粒)

調味料 :
1.蠔油-2湯匙  2.生抽-1.5湯匙  3.胡椒粉-適量  4.糖-1茶匙  5.鹽-1/2茶匙  6.五香粉(1/4茶匙)

1. 白蘿蔔去皮切頭尾..洗淨切條~加清水同煮至半熟
2. 倒出蘿蔔水(待暖)+粘米粉完全拌勻
3. 食材全切幼粒~燒熱油..爆香食材~加入蘿蔔條炒勻
4. 加調味料炒勻至收汁~關細火..慢慢倒入粉漿快手炒勻至完全黏稠
5. 糕模掃少許油~將蘿蔔糕料平均放入糕模內~留2粒瑤柱絲..每盒平均放些在糕面上
6. 以中火隔水蒸40分鐘至全熟即成

P.S. 
1. 用牙籤刺糕~不沾牙籤即全熟
2. 浸過的瑤柱水+清水(共400ml)