食譜。瑤柱蘿蔔糕

上星期除左做大掃除~仲有一日要做陪診..陪奶奶覆診

因為個個都話唔得閒~奶奶咪直接搵我囉

加上早排agent投訴過~工人依家唔可以夾住兩個老人家出街

老爺近排身體已經差左好多..兩老又易跌~一齊出街照顧唔到

所以工人係屋企睇住老爺~我就陪奶奶覆診~因為怕佢跌

我全程用右手手臂..用力夾實奶奶左手手臂~蝸速去醫院覆診

其實我有叫佢..不如買張輪椅去睇醫生~佢又嫌肉酸..唔肯坐

果晚陪佢返屋企..我再返到屋企已經20:00~因為要用力扶佢

攪到手及後背舊傷復發~唉! 無啦啦又要洗錢去睇針灸+食中藥

之後叫左老闆~如果佢細佬..再係唔得閒陪奶奶睇醫生

唔該搵平安鐘管家服務陪診~我真係無本事再陪佢睇醫生

加上佢地其實依家需要..看護多過工人囉

******
手+背傷左..痺痛到無血到冰咁凍~已經用唔到大力

所以老闆話今年d糕..唔外送比人~夠我地食就算喎!

[2019。瑤柱蘿蔔糕]

食材同樣有..瑤柱,金華火腿,蝦米,臘腸(另一份準備整芋頭糕)

手切蘿蔔..先煮焗至半熟

煮好既蘿蔔水留用..用黎mix粘米粉

半熟蘿蔔炒既時間..都會有少少水出

炒到鑊底..見完全收乾晒水~之後先加入粉漿

倒入粉漿快手炒勻..蘿蔔糕料完成

可以入模..待蒸

待涼放入雪櫃..冷藏一晚~隨時食得!

今年個蘿蔔糕都整得好靚~切落去既手感帶有微彈性

手切蘿蔔..絲絲見到

煎至金黃香脆~今早早餐..就比老闆先品嚐吧!

食譜 : 

材料 : 1.白蘿蔔(4.5斤-2700g)   2.粘米粉(300g)   3.清水(200ml)
食材 : 1.蝦米(1/3細碗)   2.臘腸(1條)   3.瑤柱(3粒-浸透起絲)   4.金華火腿(適量)

調味料 :
1.蠔油-1湯匙  2.生抽-2茶匙  3.胡椒粉-適量  4.糖-1/3茶匙  5.鹽-1/2茶匙

1. 白蘿蔔去皮切頭尾..洗淨切幼條~加清水同煮至半熟
2. 倒出蘿蔔水(待暖)+粘米粉完全拌勻
3. 食材全切幼粒~燒熱油..爆香食材~加入蘿蔔條炒勻
4. 加調味料炒勻至完全收汁~關細火..慢慢倒入粉漿邊快手炒勻至完全黏稠
5. 蒸模掃少許油~將蘿蔔糕料平均放入模內
6. 以中火隔水蒸40分鐘至全熟即成

P.S. 

1. 用牙籤插入糕品中心位置，完全不沾糕..即代表全熟

2. 蘿蔔切去頭尾及刨皮..預約4斤