食譜。黑糯米椰汁糕

7月4日(星期三)~近排好懶寫blog..Baby笠都話我寫少左好多

我話..其實"遊記"都唔想寫~不過想當紀錄+比有需要既人參考
(因為寫完後1-2年..通常有唔少人會問返遊記資料~我要睇返勾起記憶..先覆到架! 哈哈)

Baby笠好大反應話..唔好呀! 唔好唔寫! 佢好鐘意睇Blog咁話喎

不過以前Yblog好玩好多~人與人之間比blogspot互動多好多呢

Anyway..好啦! 我都應承佢..間中就update下啦(哈哈)

********

之前買左包(細)黑糯米~好似食極都食唔完咁~不過仲未變既

今個星期想清埋佢~第一轉整起左..夜晚老闆食完話好好味

未黎得切..影張靚相~佢話拎返公司..同同事開心share喎

咁昨日再整多一次~反正仲有半份煮好左既黑糯米

[夏日甜品。黑糯米椰汁糕]

食材..盡量原罐用晒~係糖+粉類+清水要預份量

黑糯米係之前~預先用真空煲煮至黏稠全熟

之後再慢慢預份量整甜品~部份整左"香芋椰汁黑糯米西米糖水"

整法又係好簡單..大菜絲+清水煮溶

再加入冰糖及黑糯米..慢慢煮至完全溶糖

加上..黑糯米雪過會凝固一舊~用慢火煮返散佢

同步..椰汁+花奶+粟粉~完全拌勻幼滑(備用)

溶好糖之後~倒入粉漿..煮至黏稠杰身~可以入模

因為有大菜糕~所以都好易脫模

口感唔錯呀! 軟軟又有少少彈性

前2日整左..同老闆share試左細杯裝

老闆就拎後面2盒返去請同事食~d同事話好好味

有個仲話..佢食左半盒~我話..真係好賞面喎(哈哈)

食譜 :

1. 椰汁(1細罐)  2.花奶(1細罐)  3.粟粉(50g)  4.清水(600ml)  5.大菜絲(5g)
6. 冰糖(130g)  7.黑糯米(約半杯米)

1. 黑糯米用500ml清水煮滾20分鐘~焗煮至全熟杰身黑糯米飯
2. 大菜絲剪碎+清水完全煮溶~最細火加入冰糖及黑糯米煮至冰糖完全溶化
3. 椰汁+花奶+粟粉..完全拌勻至幼滑
4. 加入黑糯米糖水中..慢慢攪拌至濃黏稠杰身
5. 入模待涼後~冷藏凝固..切件食用即可