食譜。醃浸鹹柑桔

2月15日(星期六)~同表弟兩公婆係Feast食完Weekend Brunch

我地就拎埋d桔返娘家先~原本同媽咪一人一半各自浸既

不過真係好重~加上媽咪屋企原來有好多大樽..所以諗諗下

條懶筋又戚戚下(奸笑)~最終都係拎少少返屋企玩下算啦

其他交比媽咪負責~食晒先再返娘家拎(真係覺得自己好奸..嘩哈)

同埋..最主要想留食譜自用or等大家有興趣都可以試下呢

~ ~ ~ ~ ~ ~ ~ ~ ~ ~

下午返到娘家..等媽咪篩選~整鹹柑桔一定要用"四季桔"

通常生果店過左元宵節~有一段好短既時間會有得賣

但記得係用"四季桔"黎醃浸~而唔係用"金桔"呢

如果公司方便自己摘的話~剪既時候要留蒂部份

因為如果無蒂會好快變壞~篩選過程要揀飽滿結實

破損/壓破/完全熟腍出水都唔好要~以免一粒影響成樽桔呢

製作步驟好簡單~開著熱水爐既熱水..略略沖洗d桔

作清潔表面塵埃..同埋幫助溶化表面蠟質

沖洗一陣就可以呢~時間唔駛太耐..始終生果遇熱易熟爛

盛起..隔水

放上涼架..風乾~直至表面乾爽(我風乾左一晚)

準備乾淨既樽及粗鹽~底部放一層略厚既鹽(=見唔到樽底)

之後放入桔~一層桔+一層鹽..桔面薄薄一層鹽就可以

最後面層既鹽~薄薄封過桔面即可

之後密封樽蓋~喜歡既可以用label寫低日子作紀錄

52粒桔..用3.5包鹽整左三小樽(要視乎桔大細及樽既容量而定)

依樽係上年阿E送既~浸得好靚..D鹽開始溶化成水+桔都變色

鹹桔柑越浸得耐..越深色就越見功效~最常用於鹹柑桔沖蜜糖

除左有潤喉作用外~對聲沙及喉嚨痛都好有效用

我多數加埋1/2青檸汁~以柚子蜜沖黎當普通飲品都好好味

記得以前爺爺浸左好多年果d~係深啡黑色..勁陳年feel

食譜 :

1.四季桔-約52粒   2.粗鹽-3.5包 

1. 四季桔用溫熱水略沖及洗淨..隔水~放上涼架風乾
2. 樽底放厚鹽再放入桔~一層桔+一層鹽~重覆步驟至完成
3. 密封樽蓋~放陰涼地方醃浸即可

P.S.
1. 一般1年已經可以享用~如想更有功效..
可將醃浸年期放長一點~待鹽份完全變成水狀及桔變成啡黑色更佳
2. 桔和鹽既份量只作參考~可因應需要而作出適當調整