食譜。德國鹹豬手

近年不自覺愛上食"德國菜"..但腸類我就一般

最鐘意食"德國鹹豬手"..送啤酒hea食真係一流

反正見阿喂都鐘意食~所以決定試下整先^^

依個食譜係參考King Ludwig Beerhall德國餐廳副總廚
所教既方法~但由於時間關係..部份程序我改左

如果依佢既方法..要早一日準備~我係臨時想整

所以要轉一轉..用返自己既方法~加快完成呢
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
預備香料..八角,香葉,胡椒粒

"鹹豬手"

先用香料煲腍"鹹豬手"

"原食譜"..烚45分鐘再用溫水浸10小時

我改左烚30分鐘~放入真空煲浸焗2小時

之後..隨即過冷河+輕輕刮皮層一次

"原食譜"..醃料用麥啤+百里香浸豬手10分鐘(同時按摩豬手2分鐘..瀝乾入爐)

我改左用"茴香粉"+"香草碎"醃豬手

上左醃料..我再風乾佢4小時(下次有時間會再風乾耐一點)

焗製完成後既.."德國鹹豬手"

皮層下半好脆卜卜..但上半脆到帶點硬

應該係火力唔平均+上半太近發熱線所致(有待改善^^)

wow..但豬手既味道~就真係好正呢

雖然製作過程較多工序+焗爐會爆晒油=.="

但我都會再整~因為味道真係好唔錯

下次會改買細豬手整呢^^

食譜:1.白胡椒粒-(1小包)   2.月桂葉-(3片)   3.八角-(1小包)   4.白醋-(1湯匙)   5.水-(1/3煲)
5.鹹豬手-(1隻)   6.茴香粉-(2茶匙)   7.香草碎-(適量)   8.德國啤酒-(1/3罐)
1.煲滾熱水..放入胡椒粒滾3分鐘~再加入月桂葉及八角煮滾
2.倒入白醋拌勻~放入豬手..用細火煮30分鐘~放回真空煲浸焗2小時
3.取出豬手..隨即過冷河及輕輕刮皮層一次..洗淨抹乾
4.茴香粉+香草粉拌勻~搽上豬手皮層..風乾4小時
5.預熱焗爐..豬手噴上啤酒~放入焗爐焗至脆皮即成
* * * * * * * * * * * * * * * * * *
原食譜:
1.白胡椒-(10粒)   2.月桂葉-(2片)   3.白醋-(2茶匙)   4.清水-(1.5公升)
5.鹹豬手-(1件約1000g)   6.百里香-(10g)   7.德國麥啤-(2罐)

1.清水注煲內，加入白胡椒慢火煮三分鐘至出味。
2.於滾水加入月桂葉，略滾後調慢火，再煲約十分鐘至出味。
3.放入已解凍鹹豬手，加白醋，水滾後再以慢火烚豬手四十五分鐘。
4.鹹豬手在白醋水內烚至轉淺棕色後，熄火，浸在溫水內十小時。
5.取出鹹豬手，瀝乾。預熱焗爐至攝氏220度。
6.將一罐麥啤倒進大碗中，加入百里香，拌勻。
7.將鹹豬手放入百里香麥啤內，浸約十分鐘。
8.以麥啤浸泡豬手時，可同時為它按摩兩分鐘，再取起，瀝乾。
9.鹹豬手垂直置焗盤上，放入焗爐，以攝氏220度烤四十五分鐘。
10.將一罐麥啤倒入噴壺，每二十分鐘在鹹豬手表面噴射。豬皮烤至金黃香脆，趁熱上桌。